పడగనీడన

ప్రతి ఆత్మహత్యా చెబుతుంది 

మనిషి సంఘజీవి కాదని 

నటించడం అతని నైజమని 

మృత్యువు మరో తల్లి నీడని.

బూజుపట్టిన ఆకాశం కింద 

బుగిలిపోయిన భూగోళం మీద 

బాగా ముసలి వాడయ్యాడు మనిషి 

చాలా కాలమైంది , కళ్ళలో కపోతాలెగిరి. 

మధ్యయుగాల మనిషి 

ఎక్కడో గాడి తప్పాడు 

తోవమరిచాడు 

జారిపోయాడు. 

ఏం చేస్తాం మనమిక్కడ ? 

డాంబికం ప్రదర్శిస్తాం. 

తింటాం లొట్టలేసుకొంటూ 

అనాధప్రేత కళేబరాల్ని. 

ఇంతజేసీ సిగ్గులేకుండా 

వగుస్తాం ప్రారబ్ధం గురించి. 

గానుగెద్దుల్లా గమిస్తుంటాం 

మలమూత్రాల రొంపిలోకి. 

ఆత్మహత్యకు అనుమతి పొందాలి 

లేదంటే మిగుల్చుకోవాలి కాసిని కన్నీళ్ళు. 

" ఇది తప్పనిసరి జాగ్రత్త ఈ రోజుల్లో " 

                                                                             07/06/2008